حب ممنوع

الصدر ضايق والجفن سد عالي
يحبس وراه اسرار واحزان ودموع
اجلس مع اخواني وكـني لحالي
اتصنع البسمات والقلب موجوع
وانا كذا من سبعه ايام حالي
من بعد ذاك اللي هجرته من اسبوع
له اربع سنين وراسي مالي
ويمشي معي دايم على السمع والطوع
مليت من تمثيل دور المثالي
واللي يشوف الشوق والحب ممنوع
ياخوي انا مانيب رجال الي
هيكل من الفولاذ والصلب مصنوع
صحيح اكابر لو الاحزان فالي
واتضاهر الشبعه وانا ميت جوع
لاكن اذا حنيت لانسان غالي
طبعا بـ احس بحاله الضيق والروع
تبغى الحقيقه عاد ماكنت ابالي
كنت احسبه يشبه الغير في النوع
ويوم فقدته قلت شــ اللي جرى لي
وقام الخفوق يون وبــ صوت مسموع
وشفت الليالي غير ذيك الليالي
شفت المجره لكن البدر منزوع
احيان اعزز في لقاه احتمالي
واحيان احس ان الامل صار مقطوع